Неколку дена пред 2005 година, а АДСЛ-от на МТнет е тапа

Неверојатно е што ти значи монопол. Еве веќе влегуваме во 5-тата година од 21-виот век, а Македонија уште повеќе назадува (во сите сфери, ама тука конкретно за интернетот) благодарение на монополската позиција на нашиот телеком.

Се сеќавам пред само неколку месеци како си купував картица од Унет за 300 денари и цел месец ми беше осигурано дремењето на интернет. Плус тоа имав 128 кб/с преку ИСДН и се си беше ОК. Ништо посебно, али барем сметките беа мали. Е после, за да ја уништат конкуренцијата, Македонскиот Телеком ја зголеми 6 пати цената на телефонските импулси, а со тоа си ја отстрани конкуренцијата и почна да го бутка МТнет кој беше најскап/најглуп провајдер и го направи како единствен (А немаше потреба ни да ги намали цените бидејќи полесно им беше едноставно на сите други им ги покачи...).

Е тука дојде „единствениот излез“ т.е. изнудувањето на тешко стекнатите пари на нашиов народ со „заканата“ наречена АДСЛ. Тука, со како од ракав истресени цени, за 50 ЕВРА + ДДВ секој месец, беше нудена брзина од 384 кб/с за download и 128 кб/с за upload. И нормално, сакал-нејќел, мора да земеш. Нема друга алтернатива. Додуша ставија и на мојава населба кабловска, али треба да платам 6200 денари за приклучок плус уште 4600 денари ако сакам интернет. Баш ме интересира како им иде интернетов на тие што се на кабловска.

И ајде, тоа беше тоа. Земав АДСЛ иако сега мора цел месец да јадам само јуфки и ако има некоја посебна прилика може да си се почастам со ајвар. Некако успеав без инфаркт да ги соберам тие 3600 денари што „ги плаќав за протекција“ секој месец.

Уште на стартот почнаа проблемите. Првиот АДСЛ модем цркна за 1 ден, па морав да чекам замена. После тоа се дешаваше ден-два да бидам без интернет чисто ради разонода, едноставно немаше синхронизација меѓу модемот и линкот. Никат у живот не се постигнати тие 384кб/с. На среќен ден максимум е 280кб/с и тоа за две-три секунди.

Ај некако се навикнав на сето тоа. Арно ама еве ти го декември. Кузнае уште колку нови корисници се закачиле на истиот линк од 64мб/с што го има телеком со надворешниот свет. И неизбежното се случи: ИНТЕРНЕТОТ ПРЕКУ АДСЛ ДОСТИГНА НЕВЕРОЈАТНИ 3КБ/с (а некогаш уопште и го нема). Цената нормално си останува иста.

Незнам дали сте знаеле, али МТнет интернетот го зема преку Axelero (За да биде појасно, Axelero е на Matav исто како што е МТнет на Македонски Телеком, дури и пакетот им се вика ADSL Hobby. Кого го интересира може да види на http://www.axelero.hu/otthoniinternet/termekek/20040806adsl.html).

Што е многу интересно, додека кај нас не се симнуваат цените, а се симнуваат брзините, кај Axelero од декември сите пакети се апгрејдуваат. Сега пакетот ADSL Hobby од 384кб/с скокна на 512кб/с, а цената од 50 му падна на 30 евра месечно. По аналогија, МТнет како нивен „препродавач“ треба да го направи истото, но од нив ни глас не се слуша.

Ако продолжи вака, ќе мора да го раскинам договорот на неопределено. Тешко на оние што потпишале договор на две години. Море тешко на Македонија, пошто ако продолжи вака ситуацијава, ни интернет ни парите нема да си ги видиме.